माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले झापाको गौरिगञ्जमा आयोजित माओवादी केन्द्रको सभालाई सम्बोधन गर्दै जनताको साथ पाए भ्रष्टाचार, दलाली, र बिचौलियाको सेटिङ भत्काउने प्रतिज्ञा गरेका छन्।

सभाअघि प्रचण्डले माओवादी केन्द्रका गौरिगञ्ज–१ का वडा कमिटी अध्यक्ष तिलक राजवंशीको महाभारास्थित घरमा कोच संस्कृति अनुसार केराको पातमा खाना खाएका थिए। उनले पलेटी कसेर उसिना चामलको भात, लाफाको पेल्का (लाफा सागको चिप्लो दाल), आलु र फूलकोभीको भाजी तथा रहुँ माछाको स्वाद चाखेका थिए। प्रचण्डसँगै हरिबोल गजुरेल, इन्द्र आङबो, सावित्रीकुमार काफ्ले, जीवन आचार्य र धर्मशीला चापागाईंलगायत नेताहरूले पनि खाना खाएका थिए।

कोच संस्कृति अनुसारको भोजको व्यवस्था करिब ७५ जना सहभागी भएको यो भोजको व्यवस्थापन माओवादी केन्द्रको जिल्ला कमिटीले गरेको थियो। यसले स्थानीय परम्पराको सम्मान गरेको भन्दै सर्वत्र चर्चा भएको छ।

सभामा सरकारमाथि प्रचण्डको कडा प्रहार गौरिगञ्जमा आयोजित खबरदारी सभालाई सम्बोधन गर्दै प्रचण्डले वर्तमान सरकारलाई अलोकतान्त्रिक, असंवैधानिक, र अप्राकृतिक भएको आरोप लगाए। उनले भने, “यो सरकार भ्रष्टाचार, दलाली, र संविधानविरोधी गतिविधिका पक्षमा काम गर्दैछ। यदि जनताले २०६४ सालको जस्तै पहिलो पार्टी बनाउने समर्थन दिए, म भ्रष्टाचारको जरा उखेल्ने प्रतिज्ञा गर्दछु।”

प्रचण्डले प्रधानमन्त्री केपी शर्मा ओलीको नेतृत्वमा रहेको सरकारले देश, संविधान, र लोकतन्त्रका विरुद्धमा काम गरिरहेको उल्लेख गर्दै यस सरकारलाई इतिहासकै सबैभन्दा भ्रष्ट सरकारको संज्ञा दिए।

सभापछि प्रचण्डको भोज र कोच संस्कृति प्रति देखाएको सम्मानले जनतामाझ नयाँ चर्चा जन्माएको छ।