१३ माघ २०८१, राजेश आचार्य / झापा झापाली समाज युएईको वृत्तचित्र “हाम्रो दायित्व” प्रिमियर कार्यक्रम सम्पन्न भएको छ ।

झापाली समाज युएइले बिर्तामोड २ चारपाने स्थित श्री होटेलको सभा हलमा एक कार्यक्रमको आयोजना गरी “हाम्रो दायित्व” प्रिमियर गरेको हो। झापाली समाज युएई नेपाल सम्पर्क समितिका अध्यक्ष राजेन्द्र कुमार दाहालको अध्यक्षता तथा एक्सेल डेभलपमेन्ट बैंक लिमिटेडका कार्यकारी प्रमुख डा. इन्द्रकुमार कट्टेलको प्रमुख आतिथ्यमा कार्यक्रम सम्पन्न भएको थियो ।

वृत्तचित्र निर्माण समितिका संयोजक तथा झापाली समाज युएईका केन्द्रीय संस्थापक सदस्य प्रदीप कुमार संग्रौलाले सञ्चालन गरेको उक्त कार्यक्रममा झापाली समाज युएइले समाज कल्याण र रूपान्तरणका लागि स्थापना कालदेखि हालसम्म गरेका गतिविधिहरू समेटेर बनाइएको वृत्तचित्र “हाम्रो दायित्व” प्रदर्शन गर्नुका साथै वृत्तचित्र निर्माण गर्न विशेष योगदान पुर्‍याउने व्यक्तित्वहरूलाई सम्मान गरिएको थियो। स्थापना कालदेखि नै समाज कल्याण र रूपान्तरणका लागि विभिन्न क्षेत्रमा सहयोग पुर्‍याउँदै आइरहेको झापाली समाज युएईले उक्त कार्यक्रममा पनि अपाङ्गता भएका विद्यार्थीहरूको लागि सहयोग पुर्‍याउने उद्देश्यका साथ अक्षयकोष बाट प्राप्त भएको ब्याज रकमलाई अपाङ्ग भएका विद्यार्थी पढाउने संस्थालाई हस्तान्तरण गरेको थियो।

कार्यक्रममा झापाली समाज युएका विभिन्न पदमा रहनुहुने पदाधिकारी, स्थानीय तहका जनप्रतिनिधि, विभिन्न संघ संस्थाका पदाधिकारी साथै समाजसेवी तथा बुद्धिजीवी व्यक्तित्वहरूको बाक्लो उपस्थिति रहेको थियो।