सेवामा कफीको मिठास, सम्बन्धमा विश्वास

झापा, हल्दिबारी – सेवाग्राही गाउँपालिकाको कार्यालयमा पस्नासाथ कुनै कर्मचारीले होइन, स्वयं अध्यक्षले स्वागत गर्दै कफी सर्भ गरिदिन्छन् भने त्यो दृश्य सामान्य लाग्दैन। तर, झापाको हल्दिबारी गाउँपालिकाका अध्यक्षले भने यही अभ्यासलाई आफ्नो सेवा शैलीको हिस्सा बनाएका छन्।

विगत केही वर्षदेखि अध्यक्ष सेवाग्राहीलाई थर्मसबाट कफी खन्याएर आफैँ सर्भ गर्ने काममा निरन्तर लागिरहेका छन्। कार्यालयमा आउने नागरिकलाई कफीको कप थमाउँदै मुस्कानसहित उनी सोध्छन् – “के कति कामले आउनु भएको?”

यो कार्यशैलीले सेवाग्राहीहरूलाई आत्मीयता र सम्मानको अनुभूति गराउने गरेको छ। “अध्यक्षज्यूको यस्तो व्यवहार देख्दा हामीलाई आफ्नो समस्या सहज रूपमा राख्न हिम्मत आउँछ,” एक सेवाग्राहीले प्रतिक्रिया दिए।

अध्यक्षको यो सादा तर प्रभावशाली व्यवहारले स्थानीय तहमा जनप्रतिनिधिको भूमिका कस्तो हुनुपर्छ भन्ने उदाहरण प्रस्तुत गरेको छ। सत्तामा बसेको व्यक्तिले जनताको सेवा गर्नुपर्छ भन्ने भावना उनले व्यवहारमै देखाएका छन्।

उनी भन्छन्, “जनताले मलाई विश्वास गरेर चुनेका छन्। म तिनीहरूको सेवक हुँ। एउटा कप कफीले उनीहरूको दिन खुसी बनाउन सक्छ भने म किन नगर्ने?”

उनको यो सानो प्रयासले जनताको मन जित्नुका साथै कार्यालयको वातावरण पनि आत्मीय बनाएको छ।