बागलुङ । रुकुम-पश्चिमबाट काठमाडौं आउँदै गरेको बस बागलुङको निसीखोलामा दुर्घटना भएको छ । मध्यपहाडी लोकमार्गको बागलुङ खण्डमा भएको दुर्घटनामा आठ यात्रुको मृत्यु भएको छ ।

प्रहरीका अनुसार बागमती प्रदेश ०१-००६ ख ३८७९ नम्बरको बसमा यात्रारत २४ यात्रु घाइते भएका छन् । बस बागलुङको निसीखोला गाउँपालिका ६, जाउलेपानीमा सडकबाट करिब १५० मिटर तल खसेको छ ।

सोमबार साँझ करिब साढे ५ बजे भएको यात्रुवाहक बस दुर्घटनामा मृत्यु भएकाको परिचय नखुलेको प्रहरीका निरीक्षक दीपकबाबु केसीले जानकारी दिए ।

घटनास्थल सदरमुकामदेखि १३० किलोमिटर पश्चिममा पर्छ । घटनाबारे थप अनुसन्धान भइरहेको जिल्ला प्रहरी कार्यालयका सूचना अधिकारी मदन केसीले जनाए ।