यातायात व्यवस्था कार्यालय झापाको उदासीनताका कारण सयौं सेवाग्राहीहरू ठगिएका छन् ।
कार्यालयको छाप र अधिकृतको हस्ताक्षर नै किर्ते गरेर एक बिचौलियाले सेवाग्राहीलाई ठगेको खुलासा भए पनि त्यसलाई रोक्न कार्यालयले उदासिनता देखाएको हो ।
लामो समयदेखि यातायात व्यवस्था कार्यालय झापामा लेखापढीको काम गर्दै आएका कन्काई निवासी विशाल भण्डारीले सेवाग्राहीको लाखौं रुपैयाँ ठगि गरेर फरार भएका हुन् ।

उनले कर्मचारीको मिलेमतोमा कार्यालयको छाप र अधिकृतको हस्ताक्षर किर्ते गरेर सेवाग्राहीको रकम लिएर फरार भएको पीडितहरूको भनाई छ ।
मोटरसाइकल, स्कुटर , ट्याक्टर लगायतका सवारी साधनहरूको कर तिर्न सेवाग्राहीबाट भण्डारीले रकम लिएर कार्यालयमा भने रकम दाखिला नगरेको खुलेको हो ।

कर तिर्नका लागि यातायात कार्यालयमा सेवाग्राही पुग्दा सिस्टममा कर तिर्न बाँकी रहेको देखिएपछि सेवाग्राहीले आफुहरु ठगिएको थाहा पाएका हुन् ।
बिचौलिया भण्डारीले सेवाग्राहीहरूलाई दिएको बिलबुकमा यातायात व्यवस्था कार्यालयको छाप र अधिकृतको हस्ताक्षर छ ।

कार्यालयको छाप यसरी दुरुपयोग हुँदा पनि यसलाई रोक्नका लागि कार्यालयले कुनै पहल कदमी गरेको छैन । सेवाग्राहीहरूले आफूहरू पीडित भएको गुनासो पटकपटक कार्यालयका प्रमुख प्रेमप्रसाद सापकोटा समक्ष राख्दा पनि उनले कुनै सुनवाई नगरेको सेवाग्राहीको गुनासो छ ।

त्यही क्रममा आज सेवाग्राहीहरुले यातायात व्यवस्था कार्यालयमै पत्रकार सम्मेलन गर्दै कार्यालयमा ध्यानाकर्षण पत्र समेत बुझाएका छन् ।
फरक फरक प्रकृतिको घटनामा कतिपयको बिल नै नक्कली , नबिकरण नक्कली समेत फेला परेको छ ।
आज कृष्णप्रसाद कडेरिया, रमण अधिकारी ,बद्री चौधरी, युवराज अधिकारी, परमानन्द राजवंशी , प्रेमप्रसाद अधिकारी जामुनबाडी सामुदायिक वन, अमरबहादुर चौहान, विजय पाण्डे निश्चल ओली, नितिन अग्रवाल , यसनाथ अधिकारी लगायतका पीडित सेवाग्राहीहरुले कार्यालय प्रमुखलाई ज्ञापनपत्र समेत बुझाएका छन् ।

भण्डारीले कसैलाई फर्जी बिल खडा गरि, फर्जी बिल उपलब्ध गराएको र कयौँको बाईक समेत विक्रि वितरण भए पश्चात् नामसारी नगरेको पाईएको साथै बिल बुकमा आफैँले मिति, सहि र छाप राखी सेवाग्राहीलाई ठगेका हुन् ।

यातायातबाट सेवाग्राहीहरूले सेवाभन्दा पनि शास्ती पाउँदै
यातायात कार्यालयबाट सेवाग्राहीहरूले सेवाभन्दा पनि शास्ती पाउँदै आएको गुनासो गरेका छन् । तर कार्यालय प्रमुख प्रेम सापकोटा भने त्यो स्वीकार्दैनन् कार्यालयका यत्रतत्र कोठामा राखिएका फाइलहरू, ढड्डाहरु , छापहरु, बिचौलियाले आफै बोकेर हिँड्ने गरेका छन् । त्यतिमात्र नभएर सेवाग्राहीलाई दिएको बिल र कार्यालयमा रहेको भिट्याक्समा रकम नै फरक परेको पाइएको छ। कार्यालयको सिस्टम नै इरेज गरेर डाटा हटाएको तथ्य फेला परेको छ। यसअघिका वर्ष सेवाग्राहीले तिरेको कर सिस्टममा नै देखिँदैन ।
यसरी बिचौलिया हाबी हुंदा सेवाग्राहीको महत्वपूर्ण कागजपत्र , कार्यालयको छाप समेत यसरी दुरुपयोग भइरहेको छ । कार्यालय बाट हुने यस्ता त्रुटि सच्याउन तर्फ कार्यालय प्रमुख सापकोटाले ध्यान नदिँदा अझ पनि अन्य सेवाग्राहीहरु ठगिने जोखिम बढेको छ ।

कार्यालय प्रमुख नै दुःख दिन्छन्, सेवाग्राहीलाई त्यस्तै सवारी चालक अनुमती पत्रमा नागरिकता नम्बर, नामको अंग्रेजी अक्षर बिग्रेको , बाबुको नाम बिग्रेको जन्म मिति बिग्रेको जस्ता कार्य तुरुन्तै सच्याइ दिनु पर्नेमा सातामा एक पटक मात्र गर्ने भन्दै सेवाग्राहीलाई दुःख दिने गरेका छन् ।
सेटिङ मार्फत आएका सेवाग्राहीको भने रकम असुलेर तुरुन्तै गर्ने गरेका छन् । त्यस्तै अस्थाइ रुपमा प्रदान गरिने सवारी चालक अनुमती पत्रको कार्ड बिहान १० बजेदेखि नै वितरण गर्नु पर्ने भए पनि २ बजेपछि मात्र वितरण गर्ने गरेको र सेटिङमा बिचौलिया मार्फत आएकाहरुको भने तुरुन्तै गर्ने गरेका छन् ।

यश बिषयमा पत्रकारहरुले प्रश्न गर्दा कार्यालय प्रमुख सापकोटाले सतही जवाफ दिँदै पन्छिने कोशिश गरेका छन्।