परस्त्रीसँग श्रीमान् लागेको भन्दै आत्मदाहको प्रयास गरेकी झापा बुद्धशान्तिकी रम्तेलको पनि मृत्यु

24 02 21

झापा । परस्त्रीसँग श्रीमान् लागेको भन्दै आत्मदाहको प्रयास गरेकी झापा बुद्धशान्तिकी माया रम्तेलको पनि मृत्यु भएको छ । ५ वर्षकी छोरी वर्षा विकलाईसँगै लिएर शरीरमा पेट्रोल खन्याई आत्मदाहको प्रयास गरेकी बुद्धशान्ति गाउँपालिका-२ स्थित गोपालडाँडा घलेगाउँकी २८ वर्षीया मायाको उपचारका क्रममा बुधबार बिहान ८ बजे प्रादेशिक अस्पताल भद्रपुरमा मृत्यु भएको जिल्ला प्रहरी कार्यालय झापाले जनाएको छ । छोरी वर्षाको फागुन ५ गते बिहान उपचारको क्रममा मृत्यु भएको थियो ।

गत फागुन ४ गते राति साढे ८ बजेको समयमा मायाले श्रीमान् राजन अन्य महिलासँग सम्बन्धमा राखेको भन्दै छोरी वर्षालाई आफ्नै शरीरमा सलले बाँधी शरीरभरि पेट्रोल खन्याई आत्मदाहको प्रयास गरेकी थिइन् । आमाछोरीले शरीरमा आगो लगाएको स्थानीयले देखेर तत्काल प्रहरीलाई खबर गरेका थिए ।

त्यसको भोलिपल्ट उपचारका क्रममा बीएण्डसी हस्पिटलमा वर्षाको मृत्यु भएको थियो । मायाको पनि बीएण्डसी हस्पिटलमा उपचार भइरहेकोमा त्यहाँबाट फागुन ६ गते उपचारको लागि उनलाई प्रादेशिक अस्पताल भद्रपुर रेफर गरिएको थियो । प्रहरीले घटनास्थल नजिकै श्रीमानको बारेमा लेखिएको सुसाईड नोट फेला पारेको थियो । यता प्रहरीले श्रीमान् राजनलाई घटना भएकै दिन पक्राउ गरी अनुसन्धान गरिरहेको जिल्ला प्रहरी कार्यालय झापाका प्रहरी निरीक्षक ढुण्डिराज गिरीले जानकारी दिए ।