हल्दिबारीमा सवारी दुर्घटना: दुईजनाको मृत्यु

Advertisement

बिर्तामोड झापा / हल्दिबारी गाउँपालिका वडा नम्बर ५, सोडागान्धि चोक स्थित हुलाकी मार्गमा भएको सवारी दुर्घटनामा दुईजनाको मृत्यु भएको छ। राजगढबाट जलथलतर्फ आउँदै गरेको मे १ ज ३२६१ नम्बरको पिकअप गाडीले जलथलबाट राजगढतर्फ जाँदै गरेको मे ९ प ९६८५ नम्बरको मोटरसाइकललाई ठक्कर दिएको थियो।

दुर्घटनामा गम्भीर घाइते भएका मोटरसाइकल चालक र सोही मोटरसाइकलमा सवार दुई पुरुषलाई उपचारका लागि बिर्तामोड स्थित बी एण्ड सी अस्पताल पठाइएको थियो। चिकित्सकले उपचारको क्रममा ८ बजे दुबैजनालाई मृत घोषित गरेका छन्। मृत्यु हुनेमा हल्दिबारी गाउँपालिका-५ निवासी मोटरसाइकल चालक प्रेम प्रसाईं हुन् र सुनसरी वराहक्षेत्र–०६ प्रकाशपुर बस्ने २१ वर्षीय बिकेश कार्की भएको जिल्ला ट्राफिक प्रहरी कार्यालय झापाले जनाएको छ । । दुर्घटनापछि उनीहरूको शव बिर्तामोड स्थित बी एण्ड सी अस्पतालको शव गृहमा राखिएको छ।

पिकअप चालक,भद्रपुर नगरपालिका वडा नम्बर २ निवासी ३७ वर्षीय दिपेन राईलाई जिल्ला प्रहरी कार्यालय झापाले नियन्त्रणमा लिएको बताईएको छ । सो सम्बन्धमा थप अनुसन्धान कार्य जारी रहेको प्रहरीले जनाएको छ।

Advertisement