हल्दिबारीको एकता सहकारीबाट लाखौँ रकम चोरी गरेको आरोपमा एक पक्राउ

Advertisement

झापाको हल्दिबारी गाउँपालिका-२ स्थित एकता बहुउद्देश्यीय सहकारी संस्थामा चोरी भएको घटनाका एक आरोपीलाई प्रहरीले सर्लाहीबाट पक्राउ गरेको छ ।

पक्राउ पर्नेमा सर्लाहीकै सुजित आले रहेका छन् । उनलाई शनिवार पक्राउ गरिएको हो । घटना भएको करिब ११ महिनापछि आलेलाई पक्राउ गरी झापा ल्याइएको प्रहरी स्रोतले जनाएको छ । २०७९ साल माघ २० गते उक्त सहकारीको मुख्य गेट र भल्ट (सेफ) फुटाई ११ लाख ७ हजार ७ सय ६३ रुपैयाँ चोरी भएको संस्थाका अध्यक्ष हरिकृष्ण अधिकारीले बताए । घटनापछि आरोपित आले भारतमा लुकेर बसेका थिए । घर आएको मौकामा उनलाई पक्राउ गरिएको जनाइएको छ ।

सहकारीको सिसी क्यामेरा फुटेजको आधारमा जिल्ला प्रहरी कार्यालयको अनुसन्धान टोलीले आलेलाई पक्राउ गरी अनुसन्धान गरिरहेको जनाइएको छ । सिसी क्यामेरा फुटेजमा चोरीमा संलग्न २ जना देखिएका छन् । अर्का व्यक्तिको पनि खोजी भइरहेको जनाइएको छ ।

समाचार साभार प्रतिदिन दैनिक

Advertisement