दुई हप्ता बित्यो, अझै पत्ता लागेन विष्टको हत्यारा

24 05 23

झापाको बिर्तामोडमा मध्यरातमा आफ्नै घरभित्रै एकजना बृद्धा महिलाको हत्या भएको दुई हप्ता पुगिसक्दा पनि प्रहरीले हत्यामा संलग्नलाई पक्राउ गर्न सकेको छैन ।

यद्यपि प्रहरीले अनुसन्धान तीव्र बनाएको जनाएको छ । बिर्तामोड-४ कालिका टोल निवासी ६८ वर्षीया विष्णुमाया विष्टको बैशाख २६ गते हत्या भएको थियो ।

घरमा एक्लै भएको अवस्थामा विष्ट मृत अवस्थामा भेटिएकी थिइन् । उनको खन्तीले हानेर हत्या गरिएको प्रहरीले सोही समय पुष्टि गरेको थियो ।

हत्या भएको दिन बिहानैदेखि अनुसन्धान जारी राखेको बताउने प्रहरीले हत्यारा अझै पत्ता लगाउन सकेको छैन । प्रहरीका अनुसार मृतकको शव भुइँमा रगतमा लटपटिएको र कोल्टे परेको अवस्थामा भेटिएको थियो ।

प्रहरीले घटनाको अनुसन्धानका लागि धरानबाट प्रहरी कुकुर समेत मगाएको थियो । कुकुरले घरको पश्चिम दक्षिणतर्फ केही संकेत दिए पनि लिटल फ्लावर्स स्कुलदक्षिण पुगेपछि अल्मलिएको थियो ।

प्रहरीले हालसम्म शंकाको घरामा रहेको व्यक्तिहरुलाई बयान तथा सोधपुछ गरेको जनाएको छ । झापाका प्रहरी प्रमुख मिलन केसीले घटनाको विषयमा गहिरो अनुसन्धान भइरहेको बताए । उनले ११ जना प्रहरीहरु अनुसन्धानमा खटिरहेको जानकारी दिए ।

सिआइबीको टोली, प्रदेश टोली, जिल्ला प्रहरी र इलाका प्रहरी अनारमनीको प्रहरीको टोलीले संयुक्त अनुसन्धान गरिरहेको बताए । घटनास्थलबाट केही प्रमाण पनि बरामद गरेको प्रहरी स्रोतले जनाएको छ ।

प्रहरीले घटनास्थल आसपास र केही क्षेत्रमा बसेर घटनाको अनुसन्धान गरिरहेको बताए पनि कुनै सुराक भेट्न सकेको छैन ।

घटनाको १६ औँ दिन बितिसक्दा पनि अपराधीको पहिचानमा सकस भइरहेको छ भने हत्या कसले, किन ग-यो भन्ने रहस्य खुल्न नसक्दा बिर्तामोडबासीमा त्रास उत्पन्न भएको छ ।

साभार : झापा टुडे