बिर्तामोडको हर्कलाल मार्गको भक्तबारी चोकमा स्थानीयले विराधस्वरुप धान रोपे

23 07 15

बिर्तामोड। बिर्तामोडको रिङरोडको रुपमा रहेको हर्कलाल मार्गको निर्माणमा जनप्रतिनिधिहरुले बेवास्ता गर्दा आवतजावतमा समस्या भएपछि स्थानीयहरुले विराधस्वरुप धान रोपेका छन् ।

बिर्तामोड नगरपालिका वडा नम्बर ४ स्थित हर्कलाल मार्गको भक्तबारी चोकमा स्थानीयले आज बिहान धान रोपेका हुन् । जनप्रतिनिधिलाई पटक–पटक पुरुवाका लागि जानकारी गराउँदा समेत वास्ता नगरेको र बर्षात शुरु भएसँगै बाटोमा आवतजावत गर्न समस्या भएकाले बिरोधस्वरुप बीच बाटोमा धान रोपिएको स्थानीयले बताएका छन् । सो बाटोमा पुरुवाका लागि पटक–पटक बिर्तामोड–४ का वडाध्यक्ष राहुलकुमार शर्मालाई मौखिक तथा लिखित जानकारी गराउनुका साथै नगरप्रमुख पबित्रा महतारा प्रसाई र उपप्रमुख नगेन्द्रप्रसाद संग्रौलालाई मौखिक जानकारी गराउँदा समेत उनीहरुले चासो नदिएको स्थानीय गोपी अधिकारीले बताए ।

हर्कलाल मार्गमा बजेट परेको र अब निर्माण हुने हल्ला पटकपटक चलाइएपनि त्यस सडक बजेट अभावमा जीर्ण भइसकेको छ । त्यस महत्वपूर्ण सडकमा आवतजावत गर्न कष्ट व्यहोर्नुपर्ने अबस्था छ । झापा क्षेत्र नं २ का संघीय सांसदसमेत रहेका सभामुख देवराज घिमिरेले आगामी आर्थिक वर्षको बजेटमा त्यस सडकका लागि ५० लाख रुपैयाँ विनियोजन गराएका छन् । जुन बजेट हात्तीको मुखमा जिराजस्तै हुने भएको छ ।