इलाम, जेठ २९ गते – कोशी प्रदेश प्रहरी प्रमुख प्रहरी नायब महानिरीक्षक (डीआईजी) ईश्वर कार्कीले जिल्ला प्रहरी कार्यालय इलामको निरीक्षण भ्रमण गर्नुभएको छ। भ्रमणका क्रममा उहाँले कार्यालय भवन, मेस, विभिन्न शाखाहरू तथा हिरासत कक्षको अवलोकन गर्दै सेवा प्रवाहलाई अझ प्रभावकारी बनाउने निर्देशन दिनुभएको हो।

प्रहरी सेवा चुस्त र जनमुखी बनाउन जोर दिँदै डीआईजी कार्कीले प्रहरी कर्मचारीहरूलाई नागरिकसँगको सम्पर्कलाई अझ सशक्त बनाउँदै जिम्मेवारीपूर्वक कार्य गर्न निर्देशन दिनुभयो।

उहाँले समुदाय–प्रहरी साझेदारी कार्यक्रमलाई प्रभावकारी रुपमा अघि बढाउँदै आत्महत्याको बढ्दो दर नियन्त्रण गर्न जनचेतनामूलक कार्यक्रम सञ्चालन गर्नुपर्ने धारणा व्यक्त गर्नुभयो। साथै, इलामजस्तो पर्यटकीय र धार्मिक महत्वको पहाडी जिल्लामा शान्ति सुरक्षा कायम गर्न कडाईका साथ चेकजाँच गर्ने व्यवस्था मिलाउन निर्देशन दिनुभयो।

डीआईजी कार्कीले फरार प्रतिवादीहरूलाई पक्राउ गर्ने अभियानलाई तीव्रता दिनुका साथै वर्षायाममा सम्भावित विपद् (बाढी, पहिरो) का समयमा नागरिकको जीवन र सम्पत्तिको सुरक्षाका लागि तत्काल उद्धार कार्यमा परिचालन हुन सक्ने गरी प्रहरी तयारी अवस्थामा रहनुपर्ने बताए।

निरीक्षण भ्रमणका क्रममा जिल्ला प्रहरी कार्यालय इलामका प्रहरी नायब उपरीक्षक (डीएसपी) मानबहादुर राईले जिल्लाको समग्र शान्ति सुरक्षा अवस्था, जनशक्ति व्यवस्थापन, भावी कार्ययोजना र सुरक्षा चुनौतीहरूबारे प्रदेश प्रमुखलाई जानकारी गराउनुभएको थियो।