बिर्तामोड । पत्रकार उद्धव पुरीलाई सहकारी पत्रकारिता पुरस्कार प्रदान गरिएको छ । शब्दपत्र डटकमका सम्पादक पुरीलाई बिर्तामोडस्थित पतालगंगा बचत तथा ऋण सहकारी संस्थाले १५औं वार्षिक साधारण सभाको अवसरमा नगदसहित पुरस्कृत गरेको हो ।

कार्यक्रमका प्रमुख अतिथि झापा जिल्ला सहकारी संघका अध्यक्ष गणेश ढकालले पत्रकार पुरीलाई दोसल्ला ओढाएर सम्मान पत्र प्रदान गरे भने सहकारीका अध्यक्ष युवराज गिरीले नगद प्रदान गरेका थिए ।

पत्रकारिताको माध्यमबाट सहकारी क्षेत्रको विकासमा पुरीले उल्लेखनीय योगदान पु¥याएको भन्दै पतालगंगा वर्ष उत्कृष्ट पत्रकारिता पुरस्कार प्रदान गरिएको सहकारीका अध्यक्ष गिरीले बताए ।

संस्थाले उत्कृष्ट कर्मचारीका रुपमा कुमारी घोर्साई दासलाई नगदसहित प्रशंसापत्र प्रदान गरेको छ । संस्थाले सहकारीका ज्येष्ठ सदस्य करणध्वज लिम्बू, बीरबहादुर गुरुङ, उत्कृष्ट उद्यमी हेमप्रसाद उप्रेती, ममता राजवंशी, उत्कष्ट बचतकर्ता चन्द्रवहादुर कटुवाल र रामवाबु सहनीलाई नगदसहित प्रशंसापत्र प्रदान गरेको छ ।

आर्थिक वर्ष २०७९/०८० असार मसान्तसम्म एक हजार १८२ सेयर सदस्य रहेको संस्थाको शेयर पूँजी ७७ लाख ९०० रुपैयाँ रहेको अध्यक्ष गिरीद्वारा प्रस्तुत प्रतिवेदनमा उल्लेख गरिएको छ । संस्थाले आर्थिक वर्ष २०७९/०८० मा कूल कर्जा लगानी ४४ लाख ९९ हजार ७६७ रुपैयाँ गरेको उल्लेख छ ।

सहकारीका अध्यक्ष गिरीको अध्यक्षतामा भएको कार्यक्रममा प्रमुख अतिथि संघका अध्यक्ष ढकाल, कनकाई नगरपालिकाका प्रमुख प्रशासकीय अधिकृत लक्ष्मीप्रसाद खरेल, नेपाल पत्रकार महासंघ झापाका अध्यक्ष एकराज गिरी, जिल्ला बचत तथा ऋण सहकारी संघ झापाका वरिष्ठ उपाध्यक्ष उपेन्द्रप्रसाद ओली, बिर्तामोड साना सहकारी खानेपानी तथा सरसफाई उपभोक्ता संस्थाका अध्यक्ष मेघराज बाँस्तोला लगायतले शुभकामना मन्तव्य राखेका थिए ।

सहकारीका उपाध्यक्ष टंकप्रसाद भेट्वालले स्वागत गरेको कार्यक्रमको संचालन सञ्चारकर्मी लीला अनमोलले गरेकी थिइन् ।