झापाको कनकाई नगरपालिका–७ निवासी १२ वर्षीय उत्सव गौतमको शिवसताक्षीस्थित एक वेद गुरुकुलमा भएको शंकास्पद मृत्युको २३ दिन बितिसक्दा पनि घटनाको यथार्थ बाहिर आउन सकेको छैन। चैत २७ गते गुरुकुल परिसरमै रहेको स्टोर कक्षमा झुन्डिएको अवस्थामा फेला परेका बालक उत्सवको मृत्युलाई प्रारम्भमा ‘आत्महत्या’ भनिए पनि परिवारले हत्या भएको आशंका गर्दै आएका छन्।

बालकका बाबु बोधराज गौतमले घटना गम्भीर र योजनाबद्ध देखिएको भन्दै सत्यतथ्य छानबिनको माग गर्दै आएका छन्। “छोराले आत्महत्या गर्नुपर्ने कुनै कारण थिएन। गुरुकुल प्रशासन र घटनापछि प्रहरिको शिथिलताले हामी झन् शंका गर्न बाध्य भएका छौं,” उनले बताए।

प्रहरीले उजुरी दर्ता गर्न अस्वीकार गरेको आरोपसमेत परिवारले लगाएका छन्। बैशाख १६ गते पुनः जाहेरी दिन गएका भए पनि प्रहरी प्रशासनले उजुरी नलिएको र पोस्टमार्टम रिपोर्टको प्रतिलिपिसमेत नदिएको गौतम परिवारको गुनासो छ। उल्टै अनुसन्धान खोज्दा धम्क्याउने प्रवृत्ति देखिएको उनीहरू बताउँछन्।छोरा गुमाएका बोधराज गौतम न्यायको खोजीमा छन्। “छोराको लाश त देखियो, तर सत्य कहाँ छ? हामी न्याय नपाएसम्म चुप लाग्दैनौं,” उनले दृढता व्यक्त गरे।

उक्त गुरुकुलका शिक्षक देवेन्द्र भण्डारीले भने, “हामी अनुसन्धानमा कुनै अवरोध गर्दैनौं। यदि कसैले कर्तव्य गर्न चुक्यो भने कानुनी कारबाहीको पक्षमा हामी पूर्ण रूपमा प्रतिबद्ध छौं।”

भण्डारीले बिर्तामोड झापा डटकमसँग कुरा गर्दै भने, “हामी न त डाक्टर हौं, न प्रहरी। तर सत्यको पक्षमा उभिन हामी जो–कसै प्रहरी अधिकारीलाई समेत सहयोग गर्न तयार छौं।”

जिल्ला प्रहरी कार्यालय झापाका अनुसार, घटनास्थल नजिक रहेको झिलझिले प्रहरी चौकीले प्रारम्भिक जानकारी संकलन गरिरहेको छ। घटनालाई सूक्ष्म रूपमा बुझ्न इलाका प्रहरी इकाइसँग समन्वय गरी थप अनुसन्धानको प्रक्रिया अघि बढाइएको प्रहरी स्रोतले जनाएको छ।