झापाका स्थानीय तहको बैठक हल्दीबारीमा सम्पन्न,मायाको चिनो हल्दिबारीको हल्दी र चिया

24 01 05

झापा। झापाका नगरपालिका तथा गाउँपालिकाका प्रमुखहरू को जिल्ला स्तरिय बैठक पौष बिहीबार हल्दिबारी गाउँपालिकामा सम्पन्न भएको छ।

झापाका सबै स्थानीय तहका प्रमुखहरुको बिचमा आपसी छलफल तथा विभिन्न विषयमा नगरपालिका तथा गाउँपालिकाले गरेका प्रगती तथा चुनौतीको बारेमा बुझ्ने उद्देश्यले २ महिना अघि सुरु गरिएको भेटघाट प्रत्येक महिना छुट्टाछुट्टै स्थानीय तहमा भेला हुने हल्दिबारी गाउँपालिका अध्यक्ष रविन्द्र प्रसाद लिङदेनले जानकारी दिए।

छलफलमा जुन स्थानीय निकायमा अवलोकन कार्यक्रम तय हुन्छ त्यहाँ भएको कुनै विषेश विषयमा प्रस्तुतिकरण गर्ने गरिएको थियो जसमा आज हल्दिबारीमा शिक्षाको क्षेत्रमा गरिएको प्रगती तथा नविनतम प्रविधिको बारेमा प्रस्तुति रहेको थियो।

हल्दिबारी गाउँपालिका कक्षा १२ सम्म निशुल्क शिक्षा रहेको छ भने हल्दिबारी नमुना माध्यमिक विद्यालयमा प्राविधिकधार तर्फ बालीविज्ञान निशुल्क पढाई भईरहेको छ।

यसैगरी हल्दिबारीका अविभावकहरूले घरमै बसेर विद्यालयको गतिविधि अवलोकन गर्ने सिसिक्यामरा एप्स पनि रहेको छ भने एसि सहितको बालशिक्षा संचालन भईरहेको छ भने मेचे जातिको मातृभाषा पनि

पाठ्यक्रम तयार गरेर दिपेन्द्र आधारभूत विद्यालयमा पढाई भईरहेको पनि जानकारी गराईएको थियो।

हल्दिबारीको प्रस्तुति पश्चात् कार्यक्रममा सहभागी ८ वटा स्थानीय निकायका प्रमुखहरुले आफ्नो ठाउँको शिक्षा को गतिविधि जानकारी गराएका थिए।

कार्यक्रममा गौरीगञ्ज,गौरादह र झापा गाउँपालीका तथा भद्रपुर, मेचीनगर, कन्काई, शिवसताक्षी दमक नगरपालिकाका प्रमुखहरू तथा शिक्षा शाखाका प्रमुखहरू सहभागी भएका थिए।

हल्दिबारी गाउँपालिका अध्यक्ष रविन्द्र प्रसाद लिङदेन को अध्यक्षतामा भएको कार्यक्रममा उपाध्यक्ष लक्ष्मीदेवी मैनालीले स्वागत गरेकी थिइन्।

प्रमुख प्रशासकीय अधिकृत मानबहादुर वन (महेन्द्र) , ५ वटा वडाका वडाध्यक्षहरू क्रमशः देवीबहादुर थापा, शुकलाल राजवंशी, विष्णु ओली, सन्तकुमार थापा र खड्ग लावती लगायत जनप्रतिनिधिहरू, विभिन्न शाखाका शाखा प्रमुखहरू तथा कर्मचारीहरूको सहभागिता रहेको कार्यक्रमको संचालन योजना शाखा प्रमुख राजन न्यौपानेले गरेका थिए।

कार्यक्रमको अन्त्यमा अतिथिहरूलाई हल्दिबारीमा उत्पादन गरिएको हल्दिबारीको हल्दी, चिया मायाको चिनोको रूपमा हस्तान्तरण गरिएको थियो भने आगामी बैठक गौरीगञ्ज गाउँपालिकामा बस्ने तय भएको छ।