२०८२ कार्तिक २१, राजेश आचार्य।

ऐतिहासिक, पुरातात्विक र धार्मिक दृष्टिले महत्वपूर्ण कञ्चनगढधाम साधुकुटीमा यस वर्ष पनि भव्य श्रीमद्सौर्य महापुराण धनधान्याचल विराट ज्ञान महायज्ञ आयोजना हुने भएको छ। मिति २०८२ साल कार्तिक २६ गतेदेखि मसिर ४ गतेसम्म सञ्चालन हुने उक्त महायज्ञमा राष्ट्रिय तथा अन्तर्राष्ट्रिय स्तरका सुप्रसिद्ध कथावाचक धर्मगुरु आचार्य किशोर गौतम र साङ्गवेद संस्कृत माविका पूर्व प्राचार्य प्रसिद्ध कथावाचक आचार्य दामोदर न्यौपानेको मुखारा बिन्दुबाट अमृतमय कथा वाचन गर्नेछन्।

संस्थाले शुक्रबार आयोजना गरेको पत्रकार सम्मेलनमा महायज्ञका तयारी र स्थलका ऐतिहासिक पृष्ठभूमिबारे विस्तृत जानकारी दिँदै महायज्ञ आयोजक समितिका संयोजक ज्ञानु सुवेदीले कञ्चनगढधाम साधुकुटीलाई राष्ट्रिय धार्मिक पर्यटकीय क्षेत्रको रूपमा विकास गर्ने, गुरुकुल प्रवर्द्धन गर्ने, र हाल निर्माणाधीन १०८ शिवलिङ्ग सहितको दिव्य ऐतिहासिक शिवालय मन्दिर निर्माण कार्यलाई सम्पन्न गर्ने उद्देश्यले यो महायज्ञ आयोजना गरिएको बताउनुभयो।

झापा जिल्लाको चारपाने चोकबाट ७ कि.मी. दक्षिणमा अवस्थित कञ्चनगढधाम चार विगाहाभन्दा बढी क्षेत्रफलमा फैलिएको रमणीय स्थल हो। बाह्रदशी सामुदायिक वनले घेरिएको यो क्षेत्रमा शिवालय, दुर्गा, सरस्वती, राधाकृष्ण लगायतका मन्दिरहरू, साथै वेदान्त शिक्षा दिने गुरुकुल सञ्चालनमा छन्।

इतिहासका अनुसार द्वापर युगमा पाण्डवहरूले गुप्तवासका क्रममा यही क्षेत्र वरपर गाई चराएको र यही ठाउँमा कञ्चन पोखरी निर्माण गरी शिव स्थापना गरेको धार्मिक विश्वास पाइन्छ। पुरातत्वविद्हरूका अनुसार यो क्षेत्र महाभारतकालीन विराट र बन पर्वसँग सम्बन्धित ऐतिहासिक स्थल हो।

संस्थाका प्रतिनिधिहरूले हालसम्म यहाँ विभिन्न धार्मिक अनुष्ठानहरू आयोजना हुँदै आएको उल्लेख गर्दै २०५५ सालमा गायत्री स्वरूप महाराजको आगमनपछि बालिएको अखण्ड दीप आजसम्म निरन्तर प्रज्वलित रहेको जानकारी दिए। त्यस्तै २०६८ सालमा स्वामी रामानन्द गिरिज्यूको निर्देशनमा स्थापना गरिएको गौरीशंकर ब्रह्म विद्यापीठको भवन पनि निर्माणाधीन अवस्थामा रहेको छ।

महायज्ञ अवधिभर प्रत्येक दिन प्रख्यात सन्त तथा गुरुहरूको प्रवचन, सद्विजरोपण कार्यक्रम, आध्यात्मिक अनुष्ठानहरू र मङ्सिर ३ गते गंगा आरती समेत आयोजना हुने कुराको जानकारी महायज्ञ समितिका संयोजक ज्ञानु सुवेदीले दिनुभयो। सम्पूर्ण कार्यक्रम मन्दिरको आधिकारिक फेसबुक पेजमार्फत प्रत्यक्ष प्रशारण गरिनेछ।

करिब ४ लाख लागत अनुमान रहेको यस महायज्ञमा खर्चमा भन्दा पनि बढी काममा जोड दिएको र टाढाबाट आउने भक्तजनहरूको लागि खान र बस्नको समेत व्यवस्था गरिएको कुरा महायज्ञ आयोजक समितिका संयोजक ज्ञानु सुवेदीले जानकारी दिनुभयो। श्री गौरीशंकर गायत्रीस्वरुपाश्रम गुरुकुल का प्रधानध्यापक तथा महायज्ञ आयोजक समितिका सहसचिव मनोज खतिवडाले सञ्चालन गर्नुभएको पत्रकार सम्मेलन कार्यक्रममा स्वागत मन्तव्य संस्थाका संरक्षण समिति सदस्य पुण्य प्रसाद पाठकले राख्नुभएको थियो।