चोङ्वाङ्ग परिवारद्वारा पहिरो पीडितलाई राहत वितरण

09 29

ताप्लेजुङ, असोज १२ । ताप्लेजुङको मैवाखोला गाउँपालिकाका पहिरो प्रभावितलाई चोङ्वाङ्ग परिवारले राहत वितरण गरेका छन् ।

परिवारसहितको टोली बुधबार पहिरो प्रभावित क्षेत्रमै पुगेर पीडित परिवारलाई राहत सामग्री वितरण गरेका हुन् । पूर्वी नेपाल तथा नेपालबाहिर रहेका चोङ्वाङ्ग परिवारका सदस्यहरुले पहिरो प्रभावित ६५ परिवारलाई राहत सामग्री वितरण गरेका हुन् ।

पहिरो प्रभावित परिवारलाई प्रतिपरिवार १ बोरा चामल, दाल दुई किलोग्राम, नुन एक किलोग्राम र खानेतेल आधा लिटरका दरले राहत सामग्री वितरण गरिएको दीलप्रकाश याक्सो (टाइगर) ले जानकारी दिनुभयो । स्व. चन्द्र बहादुर चोङ्वाङ्ग, स्व.नरिमाया चोङ्वाङ्ग(खेबाङ्), स्व. राम प्रसाद चोङ्वाङ्ग, स्व.मन माया चोङ्वाङ्ग(ईङ्नाम), स्व. मिना चोङ्वाङ र स्व. फुल माया चोङ्वाङ्ग(तुम्बाहाम्फे)को आत्माको चीरशान्तिको कामना गर्दै पहिरो प्रभावित परिवारलाई राहत वितरण गरिएको उहाँले बताउनुभयो ।

स्वदेश तथा विदेशमा रहेका चन्द्र बहादुर फागो चोङ्वाङ्गका परिवारका सदस्यहरुको आर्थिक सहयोगमा झण्डै २ लाख ५० हजार रुपैयाँ बराबरको खाद्यान्न सामग्री वितरण गरिएको याक्साले जानकारी दिनुभयो । मैवाखोला गाउँपालिकाका अध्यक्ष विजयप्रकाश वनेमको प्रमुख आतिथ्यतामा राहत सामग्री पीडित परिवारलाई वितरण गरिएको थियो । गत असार २ गते राति भीषण वर्षासँगै गएको पहिरोका कारण साँघुको ओदक टोल जोखिममा परेको थियो ।