झापाको दमक नगरपालिका–१ स्थित रबिस्टेण्ड गेट नजिकै शनिबार राति ट्रकले स्कुटीलाई ठक्कर दिँदा एक जनाको मृत्यु भएको छ भने अर्की महिला गम्भीर घाइते भएकी छिन्।

मिति २०८२ साल वैशाख २७ गते राति करिब १०:१५ बजेको समयमा बेलडाँगीबाट दमकतर्फ आउँदै गरेको ग १ ख ६४३७ नम्बरको ट्रकले फाल्गुनन्द चोकबाट बेलडाँगीतर्फ जाँदै गरेको मे ८ प ४५५८ नम्बरको स्कुटीलाई ठक्कर दिँदा दुर्घटना भएको हो।

दुर्घटनामा स्कुटी चालक ताप्लेजुङ दोभान निवासी २२ वर्षीय अंकीत लिम्बुको घटनास्थलमै मृत्यु भएको प्रहरीले जानकारी दिएको छ। उनी दमकस्थित थकाली किचनमा स्टाफका रूपमा कार्यरत थिए।

स्कुटीको पछाडि सवार पाँचथर मिक्लाजुङ गाउँपालिका–४ की ४२ वर्षीया सृजना राई गम्भीर घाइते भएकी छन्। उनको निधार, दुबै हात र खुट्टामा चोट लागेको र उनी बोल्न नसक्ने अवस्थामा रहेको प्रहरीले जनाएको छ। प्रारम्भिक उपचार दमक अस्पतालमा गरिएको थियो भने थप उपचारका लागि उनलाई बिर्तामोडस्थित B&C अस्पताल पठाइएको छ।

दुर्घटनापछि ट्रक चालक फरार भएका छन्। ट्रक र स्कुटी दुबै इलाका प्रहरी कार्यालय दमकको नियन्त्रणमा छन्।