झापाको विर्तामोड नगरपालिका–४ स्थित एक घरमा दिनदहाडै भएको ठुलो चोरी प्रकरणमा संलग्न तीन जनालाई प्रहरीले पक्राउ गरेको छ। घरको ढोका र दराजको सेफ फोडेर लाखौं रुपैयाँ बराबरको सुनका गहना चोरी गरिएको थियो।

चोरीको घटनामा पाँच तोला आठ आनी सुनबाट बनेका गरगहना—ब्रास्लेट १ थान, सिक्री २ थान, औँठी २ थान, चन्द्रमा १ थान, तीन तोलाबाट बनेको चोकर १ थान, लकेट ७ थान—समेत चोरी भएको पीडित पक्षले जनाएको छ।

प्रहरीको अनुसन्धानको क्रममा विर्तामोड–७ निवासी २७ वर्षीय दिपेश खवासलाई नियन्त्रणमा लिइएको छ। प्रारम्भिक सोधपुछमा उनले उक्त चोरी आफूले गरेको र ती गहना विर्तामोड–४ निवासी ३५ वर्षीय पवन चौधरीलाई बिक्री गरेको स्रोतले बताएको छ ।

पवन चौधरीलाई पनि पक्राउ गरी सोधपुछ गर्दा उनले ती गहना मेचीनगर–१०, धुलावारी निवासी जयकुमार श्रापका छोरा ३३ वर्षीय आशिष श्रापलाई बिक्री गरेको बताएपछि, प्रहरीले आशिष श्रापको ‘जय ज्वेलर्स’ मा छापा मारेको थियो।

छापामारीको क्रममा चोरी भएको गहनामध्ये १ तोला २३ लाल र ८ प्वाइन्ट सुन फेला परेको प्रहरीको भनाइ छ। हाल तीनै जनालाई नियन्त्रणमा लिई चोरीसम्बन्धी मुद्दा दर्ता गरेर थप अनुसन्धान अगाडि बढाइएको इलाका प्रहरी कार्यालय विर्तामोडले जनाएको छ।