झापा, बिर्तामोड —श्रीकृष्ण जन्माष्टमीको पावन अवसरमा झापाको बिर्तामोडमा भव्य महाउत्सव आयोजना हुँदैछ। आगामी साउन ३१ गते बिहान ७ः३० बजेदेखि अग्रसेन भवनको सभाहलमा श्री राधा माधव भजनस्थलीको आयोजनामा दिनभरि विविध धार्मिक तथा सांस्कृतिक कार्यक्रम सञ्चालन हुनेछन्।

मंगलवार पत्रकार सम्मेलनमार्फत आयोजक समितिले महाउत्सवको तयारीबारे जानकारी दिँदै यसको मुख्य उद्देश्य सनातन धर्मको संरक्षण तथा प्रवर्द्धन, युवालाई आफ्नो सांस्कृतिक र अध्यात्मिक पहिचानसँग जोड्नु र हरे कृष्ण महामन्त्रको प्रचार प्रसार गर्नु रहेको बताएको छ।

महाउत्सवमा दर्शन आरती, गुरु पूजा, कृष्ण कथा, विश्व शान्ति महायज्ञ, भजन–कीर्तन, हरे कृष्ण वृत्तचित्र प्रदर्शन, बालबालिकाद्वारा सांस्कृतिक प्रस्तुतिहरू, ब्रम्हाचारी भक्तद्वारा नाट्य प्रस्तुति, महाभिषेक र ५६ भोग अर्पण गरिने छ। साँझ १२ बजे कृष्ण जन्मोत्सवको महाआरती एवं कीर्तन हुने छ भने पाँच हजारभन्दा बढी भक्तजनलाई निःशुल्क महाप्रसाद वितरण गरिनेछ।

कार्यक्रममा झापा जिल्लासहित भारतको सिलिगुढी र बिहारबाट समेत दशौँ हजार भक्तजनको सहभागिता हुने अपेक्षा गरिएको छ। बेलुकी ७ः३० बजेदेखि सुप्रसिद्ध भजन गायक राजु अधिकारी र रोशन अधिकारीको टोलीले भजन–कीर्तन प्रस्तुत गर्नेछन्।

त्यसैगरी, श्री राधा माधव भजनस्थलीले बिर्तामोड–५ को वालाजी मन्दिरद्वारा आयोजना हुने श्रीकृष्ण रथ यात्रामा समेत सहभागिता जनाउनेछ। रथ यात्रा बिर्तामोड नगरको परिक्रमा गर्नेछ जसमा स्थानीय संघ–संस्था, प्रशासन, नागरिक समाज, धार्मिक अगुवाहरू र सर्वसाधारणको सहभागिता रहनेछ।

श्रीकृष्ण जन्माष्टमी हिन्दू धर्मको महत्वपूर्ण पर्व हो, जुन भगवान् श्रीकृष्णको जन्मदिनका रूपमा विश्वभर भव्य रूपमा मनाइन्छ। विष्णुको आठौँ अवतार कृष्ण धर्म, सत्य, प्रेम र करुणाको प्रतीक मानिन्छन्।

आयोजक समितिले सबै भक्तजन, धर्मावलम्बी र नागरिकलाई यो पावन महाउत्सवमा सहभागी भई आफ्नो सांस्कृतिक तथा अध्यात्मिक पहिचानलाई अझ सशक्त बनाउन आग्रह गरेको छ।