Advertisement

पाँचथर, २५ कात्तिक – पाँचथरको हिलिहाङ गाउँपालिका-६ गुराँसेस्थित मेची राजमार्गमा शुक्रबार भएको ट्रक दुर्घटनामा गम्भीर घाइते भएका एक व्यक्तिको उपचारका क्रममा मृत्यु भएको छ। ताप्लेजुङबाट झापा जाँदै गरेको ना. ४ ख ७१२३ नम्बरको ट्रक दुर्घटनामा पाँचथर हिलिहाङ गाउँपालिका-३, पन्चमीका ५६ वर्षीय भवानी शंकर पौडेलको ज्यान गएको हो। पौडेल गोपेटारबाट लिफ्ट लिएर फिदिम जाँदै थिए।

उक्त दुर्घटनामा अन्य दुई जना घाइते भएका छन्। इलाम नगरपालिका-१२ का ५२ वर्षीय ट्रक चालक तेज बहादुर दास सामान्य घाइते भएका छन् भने झापा बिर्तामोड नगरपालिका-१, चारपानेका ट्रक मालिक ४० वर्षीय राजकुमार बस्नेत गम्भीर घाइते भएका छन्। बस्नेतको दायाँ खुट्टा भाँचिएको र घाँटीमा चोट लागेको छ। दुवै घाइतेको पाँचथर जिल्ला अस्पतालमा उपचार भइरहेको छ।

ट्रक ब्रेक फेल भएर करिब ५०/६० मिटर तल सडकबाट खसेको जनाइएको छ। मृतक पौडेलको शव जिल्ला अस्पतालको शवगृहमा राखिएको छ भने ट्रक घटनास्थलमै रहेको छ।

Advertisement